Ekonomia -

Aldi baterako txostenak

Aldi baterako erregulazioak bi fasetan luzatzea proposatu du Lan Ministerioak

Berdin mantenduko dira urriaren 31ra arte eta gero aldatu, 2022ko urtarrilaren 31 arte. Epealdi desberdinekin denbora eman nahi zaie enpresei eskaerak berritzeko. Administrazio-isiltasuna positibotzat hartuko da espedientea berritzeko eskaerari ebazpenik ematen ez zaionean.

Obra bateko langileak. EFE
Obra bateko langileak.
Obra bateko langileak. EFE

Europa Press | Eitb Media

Whatsapp Facebook Twitter Telegram Email

Aldi baterako lan-erregulazioko espedienteak urtarrilaren 31ra arte luzatzeko Espainiako Gobernuak eta eragile sozialek ostegun honetan egindako bilera behin betiko akordiorik gabe amaitu da, baina aurrerapenekin. Bihar 10:00etatik aurrera bilduko dira berriro.

Europa Pressek kontsultatutako Elkarrizketa Sozialeko Mahaiko iturrien arabera, luzapen berria bi fasetan egituratuko da: lehenengoan egun dauden baldintza berberetan mantenduko dira espedienteak urriaren 31ra arte; bigarrenak, berriz, baldintza berriak ezarriko ditu eta aurtengo azaroaren 1etik 2022ko urtarrilaren 31ra bitartean egongo da indarrean.

Bi epealdi ezartzearen helburua da enpresei txostenak berritzeko eskaera egiteko denbora gehiago ematea; hamar egun izango dituzte horretarako, urriaren 1etik 10era. Administrazioak, gero, hamar egun izango ditu erantzuteko. 

Joan den astearteko bileran, Espainiako Gobernuak planteatu zuen, epe horretan ebazpenik eman ezean, aldi baterako lan-erregulazioko espedientea berritzea ezetsitzat joko zela (isiltasun negatiboa), baina negoziazioaren iturriek baieztatu dute Gobernuak aldatu egin duela jarrera, eta administrazioaren isiltasuna positibotzat joko dela.

Salbuespenak eta prestakuntza

UGTren arabera, oraindik ere "eragozpenak" daude formakuntzari lotutako salbuespenei dagokienez, eta Exekutiboan "erresistentziak" daude langabezia-prestazioetan kontagailua hutsean jartzeko; sindikatuek, prestazio horiek gutxienez 2022ko ekainaren 30era arte iristea nahi dute.

UGTk defendatzen du, halaber, enplegu-erregulazioko espedienteak horien eraginez lanik egin gabe dauden langileentzako prestakuntza-ekintzekin lotzea ideia ona den arren, hori berme nahikoarekin egin behar dela, eta hori ez dela gertatzen planteatzen den lau hilabeterako akordio batean.

CCOO ados dago ez dela unea Covid-19 aldi baterako lan-erregulazioko espedienteen salbuespenak formakuntzarekin lotzeko, eta uste du hori espediente horiek modu estrukturalean ordezkatuko dituen barne-malgutasuneko mekanismoan jorratu behar dela. Sindikatuak eta enpresaburuak Gobernuarekin puntu hori negoziatzen ari dira  lan-erreformarako mahaiaren esparruan.

Unai Sordo buru duen CCOO Euskadik, halaber, aurreko akordioan agertzen ez ziren aldizkako langile finkoak berreskuratzea eskatu du, baita jarduera mugatzeko erregulazio espediente berriak egotea ere, pandemiaren ondorioz jarduerari murrizketak ezartzen bazaizkio.

Aldeek bihar jarraituko dute negoziatzen. Asmoa da aldaketa horiek guztiak datorren asteartean, hilak 28, Ministroen Kontseiluan onartzea, Aldi baterako lan-erregulazioko espedienteen egungo eskema irailaren 30ean indargabetuko da. 

Hau zure interesekoa bada, baliteke beste gai hauek ere izatea
Krisi ekonomikoa Nafarroa Euskal Autonomia Erkidegoa Lana Espainiako Gobernua Ekonomia Eguneko albisteak Albisteak Sindikatuak Enpresaburuak CCOO UGT Koronabirusa Industria CEOE