Iberdrolak 3.885 milioi euroko mozkin garbia lortu du 2021ean

Iberdrolak 2021ean zituen helburuak gainditu, eta 3.885 milioi euroko irabaziak lortu ditu, hau da, aurreko ekitaldian baino % 8 gehiago, konpainiak jakinarazi duenez.

Enpresa energetikoaren esanetan, iazko irabazietan izandako bultzada hori (3.800 milioi euroko helburua ezarri zen horretarako), batez ere, Ameriketako Estatu Batuetan (AEB) eta Brasilen izandako portaera operatibo onari, instalatutako gaitasun berriari, sareen aktibo arautuen pisu handiagoari eta finantza-sendotasunari zor zaie.

Iberdrolak adierazi du AEBn eta Brasilen izandako hazkunde positibo horrek konpentsatu egin duela sortze- eta bezero-negozioaren portaera negatiboa, Espainiako eta Erresuma Batuko energiaren prezio altuek eraginda.

Taldearen ustiapen-emaitza gordina (Ebitda) 12.000 milioi eurotik gorakoa izan zen iaz, % 20ko hazkundearekin, sareek eta sorkuntza berriztagarriak bultzatutako 2020ko ekitaldiarekin alderatuta. Kopuru horrekin, konpainiak urtebete aurreratu du 2022rako aurreikusitako irabazi gordinen aurreikuspena.

Horrela, Iberdrolak adierazi du 2021eko emaitza onek eta negozio berriztagarriaren etorkizunerako aurreikuspenek 2022rako hazkunde-aurreikuspenak berrestea ahalbidetzen diotela, 4.000 eta 4.200 milioi euro arteko irabaziak lortzea espero baitu.

Ignacio Sánchez Galán buru duen taldeak inbertsioak handitu zituen 2021ean, 9.940 milioi euroko marka ezarrita, aurreko urtean baino % 3 gehiago. Galanen arabera, "emaitza hauek eredu jasangarri baten arrakasta islatzen dute, eta karbono gutxiko ekonomia baterantz lan egiten jarraitzera animatzen gaituzte".

Emaitza horiekin, Iberdrolak akziodunaren ordainsaria % 5 haztea lortu du, eta ekitaldiko akzio bakoitzeko 0,44 euroan dago.

Taldeak 5.500 pertsona baino gehiago kontratatu zituen 2021ean munduan (% 40k, 30 urtetik beherakoak), 400.000 lanpostu baino gehiago sustatuz hornitzaileen artean, eta konpainiako erantzukizun-postuetan zeuden emakumeen kopuruak gora egiten jarraitu zuen, % 34raino.