Ekonomia -
ENERGIA
Tapiak Euskadiko "energia arloko itun handi bat" lortzearen alde egin du
Radio Euskadin eskainitako elkarrizketan, sailburuak itunaren alde egin du energiaren sektorea nola eraldatu aztertzeko, eta energia berriztagarriak ekoitzi eta ezartzeko. Halaber, aurreratu duenez, asteazkenean, sektoreen batzar bat izango da, eta bertan, kontingentzia plana izango da hizpide.
EITB MEDIA
Arantxa Tapia Garapen Ekonomikoko sailburuak astelehen honetan Euskadin "itun handi bat" lortzearen alde egin du, energiaren sektorea nola eraldatu aztertzeko eta, besteak beste, energia berriztagarriak ekoitzi eta ezartzeko.
Halaber, Radio Euskadin aurreratu duenez, datorren asteazkenean, hilak 7, sektoreen batzar bat izango da, eta gai zerrendako lehen puntua kontingentzia plana izango da. EAEk aurkeztutako zirriborroari dagokionez, Tapiak EH Bilduri gogorarazi dio dokumentua prestazio eta proposamen berrietara irekita dagoela.
Urkulluk egindako udazken eta negu zail baten iragarpenaren aurrean, sailburuak gaineratu du "egoerari adi egon eta lanean jarraitu" behar dela, eta hornikuntzan ez dela etenik egongo.
Bestalde, Yolanda Diazek oinarrizko produktuen prezioaren muga bat jartzeko egin duen proposamenari dagokionez, Tapiak esan du "ezin dela produktu bat bere ekoizpen-preziotik behera saldu", eta adierazi du ados dagoela laguntza mekanismo bat ezartzearekin, baina ez dela posible prezioaren beherapena "abeltzainek beren gain hartzea".
Tapiak adierazi du abeltzainarena ez dela "zerutik eroritako onurak dituzten enpresa elektrikoen antzeko kasua", eta, horregatik, zuzenean ekoizleei edo kontsumitzaileei laguntzea proposatzen du.
Automobilgintza sektoreko hainbat instalaziotan dauden etenen aurrean, Tapiak defendatu du beste herrialdeekiko mendekotasun txikiagoa eduki behar dela, eta, horretarako, Euskadin produktu propioak sortu behar direla.