Krisi Ekonomikoa -
Kalifikazioa
S&P agentziak notak jaitsi dizkie Espainiako hainbat banketxeri
Joan den astean, agentziak Espainiaren nota bi maila jaitsi eta zabor-bonutik gertu utzi ostean hartu du erabakia.
Erredakzioa
Standard & Poor's kalifikazio agentziak Espainiako hainbat banketxeen notak jaitsi ditu, zehazki, BBVA, Barclays, Caixabank, Santander, Banesto, Sabadell, Popular eta BFA-Bankia bankuei.
Ohar baten bitartez Ameriketako Estatu Batuetako agentziak adierazi duenez, BBB kalifikazio mailatik gora zeuden finantza entitate guztiei jaitsi die nota (egun estatuko zorrak duen maila bera).
Azaroan amaituko du agentziak Espainiako bankuen behin-betiko kalifikazioa, estatuaren zorraren nota jaitsierak banketxe sektorearen industria zorroen espektatibetan duen eraginaren analisia amaitu ostean.
Halaber, egun birkapitalizazio prozesuan dauden banketxeak beranduago ebaluatuko dituzte, S&P agentziak entitate horien planen eta estrategien inguruko informazio guztia jasotzen duenean.
