Baliteke gaur emakume bat etxetik botatzea Gasteizen

Ostiral honetan, Gasteizen, etxetik botako dute bikotekide ohiaren mailegua bermatu zuen emakume bat, azken orduko akordiorik ezean.

Aipaturiko emakumeak etxebizitza ordaintzeko hipoteka bat eskatu zuen, eta, ondoren, bikotekide ohiak iturgintza enpresa bat sortzeko eskatutako maileguari abala eman zion.

Antza denez, emakumeak ez daki bere bikotekide ohia non dagoen, baina ez da zorra ordaintzen ari. Kaleratzeak Stop elkarteak adierazi duenez, emakumeak ezin du hipoteka eta mailegua ordaindu, hileroko kuota ia bere soldataren parekoa baita.

Zorraren zenbatekoa 200.000 euro ingurukoa da, eta Kutxabankek zorra negoziatzeko aukera eskaini dio emakumeari azken orduetan. Beraz, oraindik litekeena da kaleratzea bertan behera gelditzea.

Kaltedunak adierazi duenez, 'lasaitu ederra' hartu du finantza erakundearen proposamenarekin, eta ondorengo orduetan zer egin erabakiko du Kaleratzeak Stop elkartearekin hitz egin ostean.