Pederastiarekin lotutako kardinalak konklabera joan daitezke

Elizgizon pederasten kasuak ezkutatzea leporatzen zaien hainbat kardinalen presentziak, besteak beste, Roger Mahonyrenak (AEB), kritika asko jaso ditu, eta Famiglia Cristiana aldizkari katolikoa irakurleei ea horiek konklabean egotea egokia den galdetzera eraman du.

"Eman ezazu zure iritzia: Mahony, bai ala ez konklabean",  galdetu du San Pablo Elkarteko astekariak, bere azken aleko lehen orrialdean, honako titular honekin: "Konklabea, Mahony kasuak eztanda egin du. Pederastia kasuak leporatzen dizkioten kardinala aita santua hautatuko dutenen artean izango da. AEBetan konklabeari uko egitea eskatu da".

"Inolaz ere ez", "ez du bere kargua merezi", "parte hartzea ekidin beharra dago", dira, besteak beste, astekari katolikoaren irakurleek eman dituzten erantzunak. Halaber, Elizak "seinale berriak" eman behar dituela nabarmendu dute, Benedikto XVI-aren pederastiaren kontrako "tolerantzia zero" oharpenei jarraituz.

Urtarrilaren 31n, Jose Gomez Los Angeleseko artzapezpikuak hartu zuen Mahonyren lekua, horrek ez zituelako salatu apaizek adingabeei egindako abusu sexualen ehunka kasu.

Mahonyk bere Twitterreko kontuan ulertzera eman duenez, konklabean parte hartzeko asmoa du, eta honako hau idatzi du: "zuen eskariak beharrezkoak dira gaurko eta biharko Elizako aita santurik onena aukeratu ahal izateko".