Gizartea -
Lehen hileko datuak
Atez atekoarekin hondakinen % 85 gaika biltzea lortu dute Astigarragan
Apirilean ezarri zuten atez atekoa, eta hilabetean hirukoiztu egin dute bereizita jasotako hondakinen kopurua.
Erredakzioa
Atez atekoa ezarri eta lehen hilabetean, hondakinen % 85 gaika biltzea lortu dute Astigarragan, Udaleko ordezkariek gaur jakinarazi dutenez.
Ordura arte, hondakinen gaikako bilketa % 30 ingurukoa zen. Esaterako, 2013ko urtarrilean hondakinen % 30,7 jaso zuten bereizita; otsailean, % 28,1 eta martxoan, % 27,2. Horrela, atez atekoa ezarri zutenetik, hirukoiztu egin dute bereizita jasotako hondakinen kopurua.
Udalak emandako datuen arabera, jasotako hondakinen % 34,9 materia organikoa zen, eta errefusa % 14,9ra jaitsi da.
Astigarragako udalak herritarrak zoriondu ditu eta eurei aitortu die lortutako emaitza "ikaragarri"en meritua. Materia organikoa bereizita biltzea eta birziklatzea beharrezko izatea "gakoa" dela nabarmendu dute.
