Gizartea -
Nafarroa
8 hilabeteko kartzela-zigorra, greban desordena publikoa eragiteagatik
Espetxe-zigorraz gain, akusatuak sei hilabetez ordaindu beharreko isuna ere onartu du, eta, ondorioz, egunean 8 euro ordaindu beharko ditu, kalte delitu batengatik.
Erredakzioa
Desordena publikoak egotzita, zortzi hilabeteko kartzela-zigorra ezarri diote ostegun honetako greba orokorrean Iruñean atxilotutako 13 lagunetako bati. Akusatuak berak onartutako zigorra izan da.
Atxilotua ostiral honetan agertu da epaile aurrean, eta, espetxe-zigorraz gain, sei hilabetez ordaindu beharreko isuna ere onartu du, Nafarroako Justizia Auzitegi Nagusiak jakitera eman duenez. Ondorioz, egunean 8 euro ordaindu beharko ditu, sei hilabetean zehar.
Epaileak, bestalde, aske utzi ditu desordena publikoak eta kalteak egotzita inputatutako beste lau lagun. Inputatuek zaborrontzi bat erre zuten, ustez, eta hilabetean behin agertu beharko dute epaile aurrean.
Atxilotutako gainerako zortzi lagunak ere aske daude.
