Gizartea -
Eguraldia
Ekaitz indartsu batek Arabako eta Bizkaiko mendebaldea astindu du
Ekaitza ezustean sortu da goizaldean, eta Araba eta Bizkaia zeharkatu ditu hegoaldetik iparraldera.
Erredakzioa
Ekaitz indartsu batek Arabako eta Bizkaiko mendebaldea astindu du gaur goizaldean, ezustean, baina dagoeneko baretzen hasi da. Ordubetean, 34 litro ur pilatu dira metro karratuko Gardeako estazioan, Amurrio eta Laudio artean.
Euskalmet euskal meteorologia agentziak azaldu duenez, ekaitza Araba eta Burgos arteko mugan eratu da gaur goizaldean, bat-batean, eta Araba eta Bizkaia zeharkatu ditu, hegoaldetik iparraldera.
Euriteak oso handiak eta bat-batekoak izan dira, batik bat Laudion, Amurrion eta Durangaldean.
Ekaitzaren ondorioz, ur asko pilatu da errepideetan, eta Trapagarango (Bizkaia) San Andres auzoa argindarrik gabe geratu da, Iberdrolak baieztatu duenez.
Euria guztiz baretuko da goizean, orduek aurrera egin ahala, eta arratsaldean uda giroa nagusituko da berriro.
