17,6 kilo speed atzeman dituzte Euskal Herrian eta Errioxan

Polizia Nazionalak 17,6 kilo speed atzeman ditu Euskal Herrian eta Errioxan drogaren aurka abiatu duen operazio batean, eta 33 pertsona atxilotu ditu; horietako 12 espetxera bidali dituzte. 72.000 dosi banatzeko prest zituzten, Alberto Breton Espainiako Gobernuak Errioxan duen ordezkariak esan duenez.

Bretonekin batera, Eliseo Gomez Errioxako Polizia Judizialaren ordezkaria eta Fernando Ascaso Antolatutako Delinkuentziari Aurre Egiteko Unitateko inspektoreburua agertu dira prentsaren aurrera, 2014ko uztailean zabaldutako operazioaren berri ematera.

Operazioaren "garrantzia" nabarmendu dute, "narkotrafikoari kolpe gogorra" eman diotelako, eta Errioxan speedaren kontra inoiz egin den operaziorik zabalena izan dela esan dute: atzemandako drogak merkatuan milioi erdi euroko balioa duela adierazi dute.

Bestalde, droga banatzeko erabiltzen ziren 14 salmenta puntu atzeman dituzte: Logroñon, berriz, droga manipulatzeko eta estupefazienteak poltsatan sartzeko tresnak ere atzeman dituzte lokal batean: bi eskopeta, zazpi ibilgailu, 36 sakelako telefono eta 12.045 euro esku-dirutan aurkitu dituzte lokal horretan.

Duela bederatzi hilabete abiatu zuten operazioa, Polizia Nazionalak Errioxan eta Euskal Herrian aisiarako hainbat gunetan droga banatzaileak identifikatu ondoren. Ikerketaren arabera, Logroñoko 39 urteko bizilagun bat zen talde horretako burua. Poliziak azaldu duenez, taldeko buruak piramide egitura zuen talde bat osatu zuen, eta bakoitzak funtzio bat zuen taldean. Atxilotutako 33 lagunek 20 eta 50 urte artean dituzte.