Arabako eta Gipuzkoako radar berriak, gaurtik aurrera martxan

Eusko Jaurlaritzako Trafiko Zuzendaritzak Araban eta Gipuzkoan jarri dituen 7 radar finko berriak -bi Araban AP-68 autobidean eta gainerako bostak Gipuzkoan AP-8 autobidean-martxan izango dira gaurtik aurrera.

Josu Zubiaga Eusko Jaurlaritzako Segurtasun sailburuak ekainean, udako trafiko operazioaren hasieran, jakinarazi zuen radar finko berri horiek prest izango zirela udazkenerako eta hala iragarri zuen Trafiko Zuzendaritzak atzo argitaratutako ohar batean.

Zazpi radar berriak ondorengo errepideetan eta kilometro-puntuetan daude: Araban, AP-68an 51,8. kilometroan Zaragozako noranzkoan, Kuartangon, eta Erribera Goitian 54,07. kilometroan, baina, Bilborako noranzkoan.

Gipuzkoako radarrei dagokionez, hauek dira kokaguneak: AP-8 autobidean 63,933 (Elgoibar); 62,464 (Mendaro) eta 29,298 kilometroetan (Aritzeta) Donostiarako noranzkoan eta 46,025 (Zumaia) eta 57,250 kilometroetan (Deba) Bilborako noranzkoan.