Gizartea -
Emakumeen aurkako indarkeria
Gizon bat atxilotu dute Iruñean emakume bati tratu txarrak emateagatik
46 urteko australiarra da atxilotua, eta Iruñean alokatutako etxebizitza batean 24 urteko emakume bati eraso egitea leporatzen diote.
agentziak | erredakzioa
Iruñean gazte batek sexu-erasoa jasan zuen egun berean, Foruzaingoak 46 urteko gizonezko australiar bat atxilotu zuen emakume bati tratu txarrak ematea leporatuta.
Atzo, 14:07etan, sanferminetako bigarren egunean, Sancho Ramirez kaleko bizilagun baten deia jaso zuen Foruzaingoak, bikote australiar batek alokatutako ondoko etxebizitzan kolpeak eta oihuak entzuten zirela eta.
Agenteak bertaratu zirenean bizilagunek jakinarazi zieten emakumea ingelesez laguntza eskatzen ari zela oihuka.
Etxebizitzara iritsita, 46 urteko gizonezko bat eta 24 urteko emakume bat identifikatu zituzten. Etxea hankaz gora aurkitu zuten, odol arrastoekin eta labana bat lurrean. Gazteak esan zien mutil-lagunak eraso egin ziola eta atzamarkak zituen bularrean. Horregatik, atxilotu egin zuten gizona tratu txarrak leporatuta.
Bestalde, Gasteizen gizon bat atxilotu dute seme-alaben aurrean emazteari ukabilkadak emateagatik.
