Gizartea -
EMAKUMEEN KONTRAKO INDARKERIA
Sexu-erasoa egin diote emakume bati Gasteizen
20 urteko gizonezko bat atxilotu du Ertzaintzak, sexu-erasoa egitea leporatuta. Gaur goizaldean izan da erasoa Gasteizen, Manuel Iradier kalean.
AGENTZIAK | ERREDAKZIOA
Sexu-erasoa egin diote emakume bati, bart, Gasteizen, Eusko Jaurlaritzako Segurtasun Sailak jakitera eman duenez. 20 urteko gizonezko bat atxilotu du Ertzaintzak, erasoarekin lotuta: sexu-erasoa egitea eta emakumea kolpatzea leporatu diote.
02:00etan izan da erasoa, Manuel Iradier kalean. Antza, emakumea aparkatuta zuen ibilgailuan sartzera zihoala, erasotzailea hurbildu zaio eta besotik helduta lurrera bota du; hainbat kolpe eman ondoren, ukituak egin dizkio.
Biktimaren bikotekidea inguruan zebilen, eta emakumea defendatzera joan denean, erasotzaileak bikotekideari ere kolpeak eman dizkio.
Segurtasun sailetik jakitera eman dutenez, biktima eta haren bikotekidea Txagorritxuko Ospitalera eraman dituzte, eta erasotzailea Santiago Ospitalera. Azken hori, erietxean artatu ondoren, atxilotu egin dute eta gaur goizean eraman dute epailearen aurrera deklaratzera.
_________________________
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.
