Gizon bat atxilotu dute, Andoaingo sutearekin zerikusia duelakoan

39 urteko gizon bat atxilotu dute igande honetan Tolosan (Gipuzkoa), joan den ostegunean Andoaingo eraikin batean (atxilotuak ere han egiten zuen lo) izandako sutearekin zerikusia duela leporatuta, Eusko Jaurlaritzaren Segurtasun Sailaren arabera.

Atxilotua bere kabuz joan da Tolosako polizia-etxera, eta atxilo hartu dute. Sutearen ondorioz, eraikinean lo zegoen gizon bat hil eta beste hiru pertsona zauritu ziren.

Ostegunean, goizeko 05:20 aldera, Andoaingo Ama Kandida etorbidean piztutako sute baten berri izan zuen Ertzaintzak. Larrialdi-zerbitzuetako langileak hara joan ziren: Ertzaintza, Udaltzaingoa, suhiltzaileak eta osasun-langileak.

Eraikinean lo zeuden hainbat pertsonak irtetea lortu zuten, sutea piztu zela ikusi ostean. Zaurituetatik bi Donostiako Ospitalera eraman zituzten eta beste bat Gurutzetako Ospitalera, erredura larriak zituelako. Sugarrak itzali zituztenean, gizon bat aurkitu zuten eraikinean, hilda.

Bertan bizi ziren pertsonen testigantza bildu eta gero, normalean han bizi den gizon falta zela ohartu ziren. Beraz, pertsona haren bila hasi ziren, sutearekin zerikusia izan zezakeelakoan.