Gizartea
Erasoak sanferminetan
Sexu erasoen aurka, manifestazioa deitu dute ostegun honetarako Iruñean
eitb.eus
Martxa 21:00etan abiatuko da, Gaztelu Plazatik. Sanferminetako lehen sei egunetan, 11 emakumeri egin dizkiete sexu erasoak edo abusuak.
-
Iazko sanferminetan sexu erasoen aurka egindako elkarretaratze bat. EFE
Gora Iruñeak eta Indarkeria Sexistaren Kontrako Emakumeen Plataformak manifestazioa deitu dute ostegun honetarako (uztailak 13) Iruñean, sanferminetan izandako sexu erasoak salatzeko.
Martxa 21:00etan abiatuko da, Gaztelu Plazatik.
Protesta horrekin, eraso matxistei erantzuteko deia egin diote aipatutako plataformek gizarteari.
Sanferminetako lehen sei egunetan, 11 emakumeri egin dizkiete sexu erasoak edo abusuak, eta 8 gizon atxilotu dituzte.
Erasotzaile horietatik, gutxienez bi kondenatu egin dituzte jada, haien aurka egindako epaiketa bizkorretan.
Lehen epaiketan, 2.880 euroko isuna eta 500 euroko kalte-ordainak emateko beharra ezarri zioten gizon bati, txupinazoaren egunean emakume bati abusuak egiteagatik.
Bigarrenean, uztailaren 9an atxilotutako gizon bati 8 hilabeteko espetxe zigorra ezarri zioten. Gainera, 750 euroko kalte-ordainak eman beharko dizkio biktimari.
