Uztaritzen, bere etxean, hilik agertu zen emakumea ito egin zuten

Itota hil zuten, Uztaritzen (Lapurdi), iragan asteazkenean, bere etxean hilik aurkitu zuten emakumea, gorpuari egindako autopsiak baieztatu duenez.

Poliziak eta Fiskaltzak, bien bitartean, hiltzailearen bila jarraitzen dute, baina eskuartean hipotesi argirik gabe oraindik ere. Kasu zaila izango dela  aurreratu dute, Euskadi Irratiak azaldu duenez.

Haurdun zegoen emakumearen gorpuari autopsia egin diote Bordelen.

Bikotekideak topatu zuen, etxe ondoko errepide batean. Biktimak 23 urte zituen eta esku-hankak lotuta, begiak tapatuta eta aurpegian ubeldura ugari zituen.

Gizona ospitalera eraman zuten, shock egoeran baitzegoen. Etxean ez zuten lapurreta zantzurik aurkitu.