Elkarretaratzea egin dute Ermuan, emakume batek jasandako sexu-erasoa salatzeko

Elkarretaratzea egin dute bart Ermuan, joan den astelehenean herriko emakume batek jasan zuen sexu-erasoa salatzeko eta gaitzesteko.

Emakumearen testigantzaren arabera, etxera zihoala, gizon bat atzetik gerturatu zitzaion eta ukituak egin zizkion. Emakumeak oihu egin zuen, laguntza eske, eta gizonak ihes egin zuen.

Erasoa salatzeko, 15 minutuko kontzentrazio isila egin dute Ermuan, Orbe kardinala plazan, "Emakumeenganako indarkeriari ez" lelopean. Udaleko ordezkariek eta hainbat bizilagunek parte hartu dute.

Elkarretaratzearen amaieran, Udaleko Bozeramaileen Batzordeak onartutako adierazpena irakurri dute. Udalak "emakumeenganako edozein abusu edo eraso gaitzetsi eta arbuiatu" du, emakumeen osasunaren, duintasunaren eta askatasunaren kontrako lesio larria direlako.

Ermuko Udalak bere "babesa eta elkartasuna" adierazi die sexu-erasoa jasan duen emakumeari eta haren senide eta lagunei, eta biktimaren esku jarri ditu bere baliabide guztiak.

___________________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.