Gizartea -
Emakumeen aurkako indarkeria
Emakume batek sexu-erasoa jasan du Zumaian, taberna batean
Biktimaren bikotekideak gertatutakoa ikusi zuen, eta esku hartzen saiatu zenean, gazteak lepoan eta aurpegian eraso egin zion.
Agentziak | Erredakzioa
Gazte bat (28 urte ditu) atxilotu dute astelehen goizean, Zumaian (Gipuzkoa), sexu-abusu eta lesio delituak egotzita, taberna baten barruan emakume bati sexu izaerako ukituak egin eta biktimaren bikotekideari eraso egin ostean.
Segurtasun Sailak ohar batean azaldu duenez, 06:30 baino minutu batzuk lehenago, Ertzaintzako Herritarren Zaintzako patruila bat eskatu zuten Zumaiako Txomin Agirre kalean, Udaltzaingoak jasotako deiaren arabera, erasoak eta sexu-abusuak izan zirelako.
Agenteak lekura bertaratu ziren, eta, udaltzaingoekin eta biktimarekin harremanetan jarri ostean, neska taberna barruan bikotekidearekin eta lagunekin dantzan ari zela, gazte bat gerturatu zitzaiola eta sexu izaerako ukituak egin zizkiola jakin zuten. Bikotekideak gertatutakoa ikusi zuen, eta esku hartzen saiatu zenean, gazteak lepoan eta aurpegian eraso egin zion.
Gertaera hauen aurrean, ertzainek ustezko erasotzailea atxilotu zuten, eta Poliziaren etxera eraman zuten. Atxilotua astearte goizean utzi behar zuten Azpeitiko Guardia Auzitegiko epailearen esku.
------------------------------
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.
