11.000 ikaslek baino gehiagok hasi dituzte unibertsitatera sartzeko probak EAEn

EAEn, Batxilergoko 10.447 ikaslek eta Lanbide Heziketako 804 ikaslek unibertsitatera sartzeko probak hasi dituzte gaur Euskal Herriko Unibertsitatean (EHU).

Iazko datuekin alderatuta, % 5,5 gehiagok egingo dituzte aurten unibertsitaterako hautaprobak. Batxilergoko ikasle guztien artetik, 7.337k euskaraz eta 3.110ek gaztelaniaz egingo dute unibertsitatera sartzeko proba.

Bost azterketa egingo dituzte: Euskara eta literatura, Gaztelania eta literatura, Espainiako historia, atzerriko hizkuntza eta Batxilergoko 2. mailako modalitateko derrigorrezko gaia.

Gai bakoitzak 0 eta 10 bitarteko nota jasoko du, eta gehienez ere 10 puntu atera daitezke fase honetan. Batxilergoko notaren eta fase orokorreko kalifikazioaren artean egindako batez besteko notan 5 puntu edo gehiago lortuz gero, proba gainditutzat joko da, ikasleak fase orokorrean gutxienez 4 puntu lortu baditu. Batez besteko notaren % 60 Batxilergoari dagokio eta % 40 fase orokorrari.