Lesiorik gabeko tratu txarrek ere urruntze-agindua ekarri behar dutela dio Gorenak

Auzitegi Gorenak ebazpen batean ezarri duenez, bikotekide ohiari edo bikotekideari egindako tratu txarrengatik, nahiz eta lesiorik ez egon, biktimarekiko urruntze agindua ekarri behar du nahitaez, delituak dakarren kartzela-zigorraz gain.

Auzitegi Goreneko Bigarren aretoak, "genero indarkeriaren biktimak babesteko", 500 metroko urruntze agindua ezarri dio emazteari belarrondoko bat eta beste kolpe batzuk eman zizkion gizonari. Berritasuna da biktima ez zutela artatu beharrik izan, ez zuela lesiorik.

Pablo Llarena epailea buru duen ebazpenak jurisprudentzia ezarri du gai honetan. Hala, bikotekideari edo bikotekide ohiari "lesiorik utzi ez duen tratu txarrak edo kolpeak" emateak "biktimarengana gerturatzeko debekua" ekarri behar du nahitaez.

Era berean, kasu hori Zigor Kodearen 57. artikuluan agertu beharko litzatekeela uste du Auzitegiak.

 

 

_________________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.