Willy Toledo, baldintzapean aske

Willy Toledo aktorea baldintzapean aske —fidantza eta kautelazko neurririk gabe— geratu da ostegun honetan, Madrilgo 11. zenbakiko Instrukzio Epaitegian azaldu ostean.  Epaileak atxilotzeko agindua eman zuen, Espainiako Abokatu Kristauen Elkarteak aktorearen aurka jarritako salaketa baten harira deklaratzera birritan deitu eta bertan azaldu ez zelako. Sentimendu erlijiosoak ustez iraintzeagatik salatu zuten aktorea.

Aktoreak ez du deklaratu nahi izan, eta defentsa abokatuak egindako galderei erantzun die bakarrik. Hala, Endika Zulueta abokatuak bere garaian aurkeztutako idatzian jasotakoak berretsi ditu. Toledoren esanetan, ez du deliturik egin, eta, beraz, "ez da beharrezkoa ezein epaileren edo fiskalen aurrean agertzea".

Aktorea atzo arratsaldean atxilotu zuten, Madrilen.

Epaitegitik ateratzean egindako adierazpenetan, atxilotuta eduki duten 20 orduetan abokatua ikusteko aukerarik ez duela izan salatu du. "Irregulartasun bat da, salatu nahi nuen", erantsi du.

Jasaten ari den "jazarpen judizial eta mediatikoa" ere kritikatu du aktoreak. "Zoroen elkarte batek Jainkoari kaka egiteagatik salatu nau. Bada, jakin dezatela, hori egiten jarraituko dut eurek umeak bortxatzen jarraitzen duten bitartean".