Bi gizon atxilotu dituzte Gasteizen bikotekideak kolpatzea egotzita

Gasteizko Udaltzaingoak 39 eta 33 urteko bi gizon atxilotu ditu bart genero indarkeria delitu bana egotzita, Udaltzaingoak ohar batean jakinarazi duenez.

Lehen atxiloketa gauerdian jazo da, Arana auzoko etxebizitza batean. Agenteek emakume bat topatu dute atarian, eta bikotekideak kolpatu egin duela esan die. Etxebizitza barruan topatu dute ustezko erasotzailea. Emaztearekin eztabaidatu duela onartu du, baina ukatu egin du jo egin izana. Biktimak, baina, aurpegia gorrituta zuen, zaplazteko bat jaso izanaren zantzuekin, eta, hori dela eta, gizonezkoa atxilotu eta epailearen esku utzi dute.

Handik ordubetera, 33 urteko gizon bat atxilotu dute Lakuabizkarra auzoan. Etxebizitza batean eztabaida gogor bat gertatzen ari zela ohartarazita, Udaltzaingoaren patruila bat bertaratu da. Agenteek bikotea galdekatu dute, eta hasieran erasorik egon ez dela esan badiete ere, emakumeak aitortu egin du azkenean. Gizona atxilotu eta emakumea osasun zentro batera eraman dute.

_______________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.