Epaileak kartzelara bidali du aita eta behin-behinean aske utzi ditu bi semeak

Agoizko Lehen Auzialdi eta Instrukzioko 2. zenbakiko Epaitegiko buruak kartzelara bidali du Kasedan (Nafarroan) hiru gizonezko hiltzea egotzita asteartean atxilotutako aita. Bi semeak, berriz, behin-behinean aske utzi ditu.

Hirurak 11:45 aldera heldu dira Agoitzera, Poliziaren furgoi baten barruan. Buruak estalita zituztela sartu dituzte epaitegira. Hedabide andana pilatu da justizia jauregiaren aurrean, eta Foruzaingoak ere segurtasun neurri zorrotzak jarri ditu.

Hiru gizonezkoak hilketa gertatu eta gutxira atxilotu zituen Foruzaingoak, ihes joan ziren autoan. 53 urteko aita eta 22 eta 18 urteko semeak dira atxilotutakoak. Lekukoen arabera, aitak egin omen zituen tiroak. Asteartetik Foruzaingoaren ziegetan eduki dituzte hirurak.

Hildakoak 50 eta 17 urteko eslabarrak eta 29 urteko Kasedako bizilaguna dira, aita-semeak horiek ere. Tiroz hil zituzten hirurak, familia biren arteko liskarra dela eta. Nonbait, Foruzaingoak jakinarazi duenez, bikote baten banaketa dago oinarrian.