Gizon bat atxilotu dute Bilbon, bikotekideari eraso egitea leporatuta

Ertzaintzak 26 urteko gizon bat atxilotu du gaur Bilbon, bikotekideari kalean eraso egin eta bera atxilotzera joan diren agenteak kolpatzeagatik, Eusko Jaurlaritzako Segurtasun Sailak jakinarazi duenez.

Gertakariak bart gertatu dira Bilboko Telleria kalean. 05:40 aldera, Ertzaintzak dei bat jaso du emakume bati kalean eraso egiten ari zirela ohartaraziz.

Tokira bertaratu diren ertzainek gizonak emakumea jotzen zuela ikusi dute.

Ertzainek erasotzailea geldiarazi nahi izan dutenean, ordea, gizonak aurre egin eta kolpeka erantzun die. Halaber, agenteetako bat lurrera bota du.

Babesa ematera joandako beste ertzainei esker, erasotzailea menderatzea eta atxilotzea lortu dute. Genero indarkeria eta agintearen aurkako atentatu delituak leporatu dizkiote.

Izapideak amaitutakoan, atxilotua Bilboko guardia epaitegiaren esku geldituko da.

_______________________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.