22 urteko gazte batek emakume bat kolpatu eta iraindu du Gasteizen

22 urteko gazte bat atxilotu dute bart Gasteizen, bikotekidea kolpatu eta iraindu duelakoan. Udaltzaingoak jakinarazi duenez, eztabaida izan zuten, eta gazteak orduantxe egin zion eraso biktimari.

21:30 inguruan jazo zen erasoa. Ordu horretan jaso zuen Udaltzaingoak gertatutakoaren abisua. Berehala, Arabako hiriburuko Alde Zaharrera bertaratu ziren agenteak, auzo horretako etxebizitza batetik baitzuten deia.

Biktimak agenteei kontatutakoaren arabera, eztabaidatzen ari zirela, gazteak kolpatu egin zuen. Emakumeak kolpeak jasan izanaren seinaleak zituen. Hori dela eta, erasotzailea atxilotu egin zuten, genero indarkeria delitua egotzita. Biktima, berriz, ospitalera eraman behar izan zuten.

___________________________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.