Gizon bat atxilotu dute Getxon emakume bati ukituak egitea egotzita

Ertzaintzak 18 urteko gizonezko bat atxilotu zuen atzo Getxon, emakume bati ukituak egitea egotzita, Eusko Jaurlaritzako Segurtasun Sailak ohar batean jakinarazi duenez.

Erasoa urtarrilaren 1ean jazo zen, Areetako auzoan, emakumea kaletik barrena zihoala. Atxiloketa atzo egin zuen Ertzaintzak, biktimak erasotzaileari buruz emandako deskribapenari esker.

Emakumeak aurkeztutako salaketaren arabera, gizonezko bat aparkatuta zeuden bi autoren artean atera zen bat-batean, eta ukituak egin zizkion genitaletan. Emakumeak oihu egin zuen eta erasotzaileari aurre egin zion. Gizonezkoak ihes egin zuen.

Gizonari sexu-abusu delitua egotzi diote, eta epailearen esku utzi dute dagoeneko.

Getxoko Udaltzaingoak ikerketapean izan zuen gizonezkoa abenduan inguru horretan egindako antzeko beste eraso bategatik.

______________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.