Gizartea -
GERTAKARIA
Elgoibarko hilketaren ustezko egileak poliziaren egoitzan jarraitzen du
36 urteko gizonezko bat hil zuten labankatuta, atzo goizaldean, eta ordu batzuetara atxilotu zuten ustezko egilea.
AGENTZIAK | ERREDAKZIOA
Elgoibarko hilketaren egilea delakoan, atzo atxilotutako 35 urteko gizonezkoak poliziaren egoitzan jarraitzen du, eta ondorengo orduotan eramango dute epailearen aurrera deklaratzera, Segurtasun Sailak jakitera eman duenez.
Atzo gertatu zen erasoa, goizaldeko 05:50 aldean, Elgoibarko Giza Eskubideen parkean. 36 urteko gizon bat hil zuten labankatuta, eta, haren bikotea, 37 urteko emakume bat, zaurituta eraman zuten Mendaroko Ospitalera.
Ertzaintzak berehala zabaldu zuen ikerketa, eta 11:00ak aldera atxilotu zuten ustezko egilea, Elgoibarren bertan. Antza, herri horretan egiten ari ziren mendi martxa batean sartu zen, eta Azkarate gainean jarrita zegoen hornidura gune batean hartu zuten preso.
Bilkura, bihar
Gertatutakoa salatzeko, Elgoibarko Udalak bilkura isila deitu du bihar arratsaldeko 19:00etarako.
