Kargurik gabe aske Donostian sexu-erasoa egiten saiatzeagatik atxilotutako gizona

Larunbat goizaldean Donostian atxilotutako 33 urteko gizona kargurik gabe aske utzi dute. Sexu-ukituak egiten saiatzea egotzita atxilotu zuten, emakume bati eta harekin batera zihoan beste bati eraso egin ostean.

Erasoa larunbat goizaldean izan zen, 01:30ean, Donostiako Ategorrieta hiribidean, Eusko Jaurlaritzako Segurtasun Sailak astelehenean jakinarazi duenez.

Antza denez, gizona, mozkortuta zegoela, bi emakumeri oldartu zitzaien, eta horietako bati sexu-ukituak egiten saiatu zen. Emakumeek ihes egitea lortu zuten. Horren berri jasotakoan, Ertzaintzak atxilotu egin zuen, eta larunbat arratsaldean eraman zuten epailearen aurrera.

Donostiako Udaleko Bozeramaileen Batzordeak adierazpena onartu du astelehen goizean, eta "irmoki" gaitzetsi du Aste Nagusiko "testuingurutik at" izandako erasoa. Portaera hori "emakumezkoen askatasuna eta duintasuna gutxiesten dituen jarrera matxista baten adierazgarri" dela azpimarratu du, eta herritar guztiei dei egin die "edozein eskubide urraketaren aurrean erne egoteko, bereziki emakumezkoek jasaten dituztenen aurrean, denok aske bizitzeko aukera izan dezagun".

Testuinguru horretan, Donostiako Udaleko Bozeramaileen Batzordearen ustez, "ezinbestekoa da hiriko gizarte eragileekin batera lanean jarraitzea gizonen eta emakumeen arteko balioetan eta berdintasunean oinarritutako heziketa baten alde". Azkenik, "egunero horrelako jarrerak eragiten dituzten faktoreetan esku hartzen jarraitzea beharrezkoa da", nabarmendu du.

_________________________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.