Poliziaren esku jarraitzen dute Bilboko tiroketako bi atxilotuek

Bilboko Bilbo Zaharra auzoan ostegun honetan izandako tiroketaren ostean atxilotutako bi lagunek Ertzaintzaren bulegoetan jarraitzen dute, eta ziur aski ondorengo orduetan utziko dituzte epailearen esku, ostiral honetan bertan, Eusko Jaurlaritzaren Segurtasun Sailak jakinarazi duenez. Tiroketa horren ondorioz, gizon bat hil zen.

Ostegun honetako 14:40 aldera, larrialdi-zerbitzuek hainbat dei jaso zituzten, eta, horien bidez, Bruno Mauricio Zabala kalean izandako tiroketa baten berri izan zuten. Zenbait patruila bertaratu ziren, eta gizon bat lurrean etzanda topatu zuten.

Osasun-langile batzuek gizona artatu zuten, baina ezin izan zuten haren heriotza saihestu. Ertzaintzak sokaz hesi zuen gunea, gizonaren heriotza eragin zuen tiroketaren ustezko egileak topatzeko asmoz; ustezko egile horiek handik gutxira atxilotu zituzten, auzo horretan bertan.

Sanfran Auzokideak elkartearen oharra

Gertaturikoaren harira, Sanfran Auzokideak elkarteak "sakonki" deitoratu du gizonaren heriotza, eta eskatu die euskal erakundeei "premiazko neurriak", gunea onbideratzeko, bertako bizilagunen "segurtasuna arrisku larrian" baitago.

Ohar batean, elkarteak krimena salatu du, eta biktimaren senideei "doluminak" agertu dizkie.

Adierazten duenez, San Frantziskon eta aldameneko kaleetan "gero eta handiagoak dira delinkuentzia eta segurtasunik eza", eta horrek egoerarik latzena ekarri du azkenean, alegia, "gizaki baten bizitzaren konpondu ezinezko galera".

Elkarteak gogora ekarri du nola, azken hilabeteotan, salatu izan duen San Frantziskon "lapurretak, droga-trafikoa, emakumeen kontrako erasoak eta borroka jendetsuak gero eta ugariagoak" izan direla, "eta, bitartean, erakundeak beste alde batera begira izan direla".

Eskatu diete agintari instituzionalei, eta, bereziki, Bilboko Udaleko alderdi guztiei, konpromiso bat, San Frantzisko "auzo segurua izateko".

Halaber, taldeak gaitzetsi du Udalek edo udal-taldeek, orain arte, ez dutela antolatu elkarretaratzerik "auzoko bizilagunek bizi duten indarkeria salatzeko".

Ohartarazi dute San Frantziskon ibiltzen diren gaizkileak "Bilboko beste gune batzuetara ere jaisten direla, delitu egiteko".