Gizartea -
Elkarrizketa ETBn
Garitano ziur dago Aralarrekin akordioa lortuko dutela
Bestalde, ahaldun nagusigaiak EAJri egingo duena argitzeko eskatu dio, izan ere, PSE-PP "ituna erabil dezake Bildu kanporatzeko".
Erredakzioa
Martin Garitano Bilduren Gipuzkoako ahaldun nagusigaiak ziur esan du koalizioak eta Aralarrek Gipuzkoan "agintzeko" akordioa lortuko dutela.
Garitanok ETBn egin dioten elkarrizketa batean azaldu duenez, Bilduk lurraldeko gobernuan parte hartzea eta mahaian bere tokia izatea proposatu zion.
Haren esanetan, Aralar aukera hori aztertzen ari da, duen batzarkide bakarra mahaira eramaten badu Talde Mistoaren bozeramaile gisa aritzeko denbora gutxiago izango duelako.
"Arazo tekniko" hori dagoela aitortzen duen arren, Garitanok ziurtzat jotzen du Aralarrekin akordio batera iritsiko direla Aldundian "agintzeko", nahiz eta ez jakin "nola gauzatuko den".
Akordioak desberdinen artean
Bilduren hautagaiak berretsi du 22 batzarkiderekin, edo Aralarrekin elkartzen badira 23rekin, goberna dezaketela lurraldean, nahiz eta ez izan 26 batzarkideko gehiengo absolutua. Hori horrela, erabakiak hartzerakoan negoziatu egin beharko dutela eta batzuetan "eman ere bai" beste alderdiekin akordioetara iristeko, baina "lehentasunezko kiderik" izan gabe.
Garitanok onartzen ditu "joko parlamentarioaren arauak", beraz, beste alderdiak elkartzen badira, onartuko luke boto gehien jaso duen alderdiak ez agintzea, baina EAJri zer egin behar duen "esateko" exijitu dio.
Izan ere, "kanpainan PP-PSOE akordioarekin abertzaleak kanporatu nahi dituztela esan eta gero" orain, itun hori erabil dezake "Bildu kanporatzeko".
