300 ibilgailutik gora arituko dira neguan errepideak zaintzen

300 baliabide mugikor baino gehiago (elurra kentzeko makinak, garabiak eta laguntza ibilgailuak) arituko dira neguan euskal errepide sarea zaintzen, Eusko Jaurlaritzako Trafiko Zuzendaritzako 2019-2020ko Neguko Bideragarritasun Planaren (NBP) arabera.

Eusko Jaurlaritzako Segurtasun Saileko Sonia Diaz de Corcuera Trafiko zuzendariak 2019-2020ko NBP aurkeztu du Euskadiko Trafiko Kudeatzeko Zentroan.

Trafiko zuzendariak azaldu duenez, NBP jarraipen eta informazio fasean aktibatuko da elurraren maila 1.000 metroko mailara heltzen denean, eta fase operatiboan 700 metrora heltzen denean eta euriaren bolumenak aholkatzen duenean.

"Garrantzitsuena trafikoan duen eragina aztertzea da, eta, ondorioz, segurtasuna bermatzeko beharrezkoak diren neurriak hartzea eguraldi baldintza txarretan", esan du zuzendariak.

Aurtengo neguan autobideak kudeatzen dituzten enpresen eta foru aldundien elurra kentzeko 190 makinak, Euskadiko Trafikoa Kudeatzeko Zentroaren zazpi garabi astunek eta beste 130 ibilgailuk hartuko dute parte koordinazio eta zaintza lanetan. Ertzaintzako Lurraldeko Trafiko Unitateak gehituko zaizkie horiei guztiei.

2018-2019ko neguan oso gutxitan aktibatu behar izan zuten plan berezia. Jarraipen eta informazio fasea zortzi aldiz aktibatu zuten, eta fase operatiboa birritan baino ez, aurreko urtean baino zortzi aldiz gutxiago.