Baionak 30 km/h-ra mugatu du gehienezko abiadura, mugikortasun jasangarria sustatzeko

Baionako Udalak hirigunean baimendutako gehienezko abiadura 30 km/h-ra mugatu du, mugikortasun jasangarria bultzatu eta kutsadura-maila murrizten saiatzeko.

Lehen ordutik ikus daitezke jada espaloietan jarri dituzten seinaleztapen zutoinak eta erreietan margotutako abiadura-muga berria. Autoek, motorrek zein bizikletek ezin dutela hirigunea orduko 30 kilometrotik gorako abiaduran zeharkatu gogorarazten dute.

Neurria gaur sartu da indarrean, Baiona erdigunetik eta Aturri ibaiaren bi ertzetatik haratago hedatzen den eremu zabal batean. Honakoa, lehen etapa baten abiapuntua da, eta baliteke aurrerago hiriko beste auzo batzuetara zabaltzea.

Udalaren iritziz, kontsumo energetikoari mesede egingo dio neurriak, eta txirrindularien zein oinezkoen segurtasunerako onuragarria izango da.