Gizartea -
Indarkeria matxista
Gizon batek emakume bat hil du Madrilen
Honezkero 13 emakume hil dira aurten Espainian; 1.046 hilketa matxistak zenbatzen hasi zituztenetik.
Agentziak | Erredakzioa
Gizon batek 75 urteko emakume bat hil du Fuenlabradan (Madril), eta ondoren bere buruaz beste egiten saiatu da, Espainiako Poliziak jakitera eman duenez.
Hilketa matxista bezala ikertzen ari diren gertaera atzo jazo zen, 13:00ak aldera, Miguel de Unamuno kaleko etxebizitza batean. Biktima bizilagun baten etxera joan zen laguntza eske, bularrean labankadak zituela.
Orduan, larri zauritutako emakumearen etxera joan zenean, horren senarra ere arma zuriz zaurituta zegoela ikusi zuen, eta 112 zenbakira deitu zuen.
Medikuak bertaratu zirenean, emakumea bihotz-biriketako geldialdian aurkitu zuten, sabelaldean eta bularraldean arma zuriz egindako bi zaurirekin, eta bihotz-biriketako bizkortze maniobrak egin ostean suspertzea lortu zuten.
Alabaina, ospitalerako bidean bihotz-biriketako geldialdia izan zuen berriro, eta hil egin zen.
Indarkeria matxista kasu bat dela baieztatuz gero, genero indarkeriaren lehen biktima izango litzateke aurten Madrilgo Erkidegoan, eta hamahirugarrena Espainian. 2003an hilketa matxistak zenbatzen hasi zituztenetik, 1.046 emakume hil dira Estatuan.
24 ordu baino gutxiagoan jazo den bigarren hilketa matxista da, Sevillan 43 urteko emakume bat hil ostean.
