Izarkomen ekimena, "ez dadin ikaslerik atzean geratu"

Izarkom telekomunikazio operadore kooperatibak ekimen solidarioa jarri du martxan Interneterako sarbiderik ez duten haurrek eskolak jasotzen jarrai dezaten, eta ikasketetan "atzean gera ez daitezen".

Hala, eskolei SIM txartelak "kostu preziotik behera" eskaintzen dizkie, behar hori duten ikasleen artean bana ditzaten.

Gari Garaialde Izarkomeko bazkideak Euskadi Irratian azaldu zuenez, "arrakala digitala" Euskal Herrian ere badago, hau da, haur guztiek ez dute Interneterako sarbidea, eta horiei zuzenduta eskaintzen dituzte, hilean 11 euroren truke, 17 GB ematen dituzten SIM txartelak.

Ekimen solidarioaren ideia Mikel Gartzia Izarkomeko bazkideak proposatuta sortu omen zen, ohartu zelako lauzpabost ikasle zituela Interneteko sarbiderik gabe. Hortik abiatuta, "konturatu ginen telefonia zerbitzua ematen dugula, eta SIM txartelak bidaltzen bagenizkien, datu kopuru nahikotxo batekin, konektatu ahal izango zirela", Garaialderen esanetan.

10:39

Oraingoz Hego Euskal Herriko eskoletan eskaintzen dute zerbitzua, eta 27 txartel bakarrik bidali badituzte ere, 30 bat eskolatatik deitu diete informazio eske. Horren harira, informazioa Izarkom.eus-en eta info@izarkom.eus-era idatzita jaso daiteke.

Izarkometik aitortu dute Interneteko sarbidea edukitzea ez dela nahikoa kasu batzuetan, etxe batzuetan ordenagailurik ere ez dagoelako, baina haiek "konexioa bakarrik" eskain dezakete.