Gasteiztarrek Andre Maria Zuriaren jai egun handia ospatuko dute

Txupinazoak eta Zeledonen jaitsierak luxuzko hasiera eman zieten 2011ko Gasteizko Andre Maria Zuriaren jaiei. Gaurtik hasita eta abuztuaren 9ko gauerdira arte, Andre Maria Zuriaren omenez egindako jaiez gozatzeko aukera izango dute gasteiztarrek.

Milaka lagun bildu ziren atzo, Andre Maria Zuriaren plazan, Zeledoni harrera egiteko. Gasteiztarrak jai giroan murgilduta daude dagoeneko, puruak errez, cava botilei kortxoa kenduz eta fanfarreko soinuez lagunduta, jai giro ezin hobe batean.

Gaurkoa festen egunik handiena da. Ondorengo hauek dira egingo diren ekitaldietako batzuk: 9:00etan, fanfarre Gesaltza Arabako Foru Aldundiko txistulari taldearekin gozatu ahal izango dute gasteiztarrek, Espainia Plazan. Ordu berean, hiriaren erdialdean, Batasuna koadrilak erdialdeko kaleak alaituko ditu idiek tiratutako karro batekin.

Erraldoien, Buruhandien, Zaldien eta Txotekoen Konpartsa 11:00etan irtengo da San Prudentzio kaletik eta Gasteizetik ibilbide bat egingo du.

Haurrei zuzendutako leku bat ere izango da Prado parkean; tailer, joko, kirol pistak... izango dira bertan. Gainera, ipuin kontalari bat egongo da 12:30ean. Ordu horretan, Aihotz plazan trikitixa dantzatu ahal izango da, eta ordubete geroago, Maialen Lujanbio, Ruben Sanchez, Igor Elortza, eta Sebastian Lizaso bertsolariek saio bat eskainiko dute.

23:00etan, Fireshow Pirotechikaren (Polonia) eskutik joango da ikuskizuna. Ordu berean, Olagibel kalean, zortzi zezensuzko ibiliko dira kaleetan zehar, eta fanfarrek lagunduko diete.

Gauerdian, Carlos Bauteren kontzertua izango da ikusgai, Foruen Plazan. Aldi berean, Pantxoa ta Peioren kontzertua izango da Aihotzen Plazan.

Abuztuaren 7an, Zeledon Txikiren eguna ospatuko dute, egun oso berezia umeentzat eta adinekoentzat. Gainera, Ken Zazpi, Jarabe de Palo eta Maldita Nerearen kontzertuak ikusteko aukera izango da.

Honekin batera, Andre Maria Zuriaren esku pilota txapelketa abuztuaren 5ean hasiko eta hilaren 9an amaituko da. Beti bezala, Ogeta frontoian jokatuko dituzte partidak.