1.020 pertsona hil dira jada koronabirusarekin EAEn

28 pertsona hil dira azken orduetan Euskadin, koronabirusak kutsatuta; beraz, osasun krisia hasi zenetik, 1.020 pertsona hil dira EAEn.

COVID-19k 12.355 pertsona kutsatu ditu Euskal Autonomia Erkidegoan, ostiral honetan beste 266 kasu atzeman ostean, Nekane Murga Eusko Jaurlaritzako Osasun sailburuak jakitera eman duenez. Horietatik 1.076 ospitaleratuta daude.

Eguneko hildakoen kopurua azken lau egunetako txikiena da, eta kutsatu berriena, berriz, azken hiruetako baxuena.

Lurraldeka, Araban 3.194 kutsatu daude, eta horietatik 174 ospitaleratuta daude (38 kasu berri izan dira azken orduotan). Bizkaian 6.868 dira kutsatutakoak, eta horietatik 664 ospitaleratuta daude (201 kasu berri izan dira). Azkenik, Gipuzkoan 2.293 positibo izan dira, eta horietatik 238 ospitaleratuta daude (27 kasu berri izan dira).

6 hildako Nafarroan eta 146 positibo berri

COVID-19ak sei heriotza eragin ditu Nafarroan azken orduetan. Gainera, 146 kutsatze berri atzeman dituzte.

Foru Gobernuak larunbat honetan emandako azken datuen arabera, 354 dira koronabirusarekin hildakoak Nafarroan eta 4.579 gaixo atzemandakoak. Hildako guztietatik, 271 ospitaleetan zendu dira, egoitzetatik joandakoak barne, eta 83 bestelako tokietan.

437 pertsona daude une honetan ospitaleratuta, atzo baino 23 gutxiago; horietatik, 285 plantan daude, 56 ZIUn eta 96 etxeko ospitaleratzean.

Pandemia hasi zenetik, 1.100 pertsonari eman diote alta ospitaleetan eta 954 dira alta epidemiologikoa jaso dutenak.

Gaur egun, Nafarroan 3.271 koronabirus kasu aktibo daude, eta horietatik 679 osasun sistemako profesionalak dira, kolektiboaren %4,4.

565 heriotza izan dira Espainian azken 24 orduetan eta jada 20.043 dira hildakoak

Espainiako Estatuan 20.043 heriotza eragin ditu jada koronabirusak, azken 24 orduetan beste 565 pertsona hil ostean, Osasun Ministerioak larunbat honetan argitaratu dituen datuen arabera.

Baieztatutako positiboak 191.726 izan dira guztira, bezperan baino 4.499 pertsona gehiago, alegia.

Bestalde, dagoeneko 74.662 lagun sendatu dira.