Gizartea -
Koronabirusa
Osasun Ministerioak gaur ezarriko ditu larunbatean kalera ateratzeko baldintzak
Illa ministroak berretsi du deseskalatzea "dinamikoa" dela, eta atzera egitea ahalbidetzen duela "gauzak behar bezala ez badoaz".
agentziak | erredakzioa
Espainiako Osasun Ministerioak gaur, osteguna, ezarriko ditu maiatzaren 2an kalera ateratzeko eta kirola egiteko baldintzak, pandemiaren joera zein den jakin ostean. Hori da Ministerioak esku artean dituen lau aginduetako bat, Espainiako Gobernuak deseskalatzeko egitasmoa asteartean onartu eta gero, Salvador Illa Osasun ministroak prentsaurreko batean azaldu duenez.
Lehenengo aginduak irizpideak ezarriko ditu, hau da, eremu bakoitzean deseskalatzearen faseak ezartzeko jarraitu behar diren datuak zeintzuk izango diren.
Ministroak iragarri duenez, gaur autonomia erkidegoetako Osasun arduradunekin elkartuko da, alarma-egoera ezarri zenetik 14. aldiz, deseskalatzeari buruz hitz egiteko.
Senideak noiztik aurrera bisitatu ahalko diren eta arrisku adina zein den galdetuta, Illak erantzun du agindu bakoitzean zehaztuko eta argitaratuko dela.
Horren harira, ministroak berretsi du deseskalatzea "dinamikoa" izango dela, 6-8 aste iraungo duela eta atzera egitea ahalbidetzen duela "gauzak behar bezala ez badoaz".
