Gizartea -
Koronabirusa
Eudelek apirilean erretiratutako 300.000 maskarak ordezkatu ditu
Hasierako banaketa apirilaren 20ko astean egin zuten, baina ondoren maskarak erretiratu egin behar izan zituzten, batzuk akastunak zirela ohartu ostean.
Agentziak | Erredakzioa
Eudel Euskadiko Udalen Elkarteak ostegun honetan amaituko du erretiratutako 300.000 maskaren ordezkatze prozesua. Aurrekoan bezala, maskarak EAEko 252 udalerrien artean banatu dira.
Maskararen banaketaz udalerriak arduratuko dira, haien lehentasunen eta beharrizanen arabera.
Gorka Urtaran elkarteburuak nabarmendu du maskara sorta handi honen bidez udalek babes-ekipoen hornidura indartu ahal izango dutela, konfinamendua arintzeko neurriekin batera: “Eudelen maskarak udalerrietara iritsiko dira gehien behar direnean; normaltasunera apurka itzultzean, beharrezkoa da maskarak erabiltzea garraioan, lantokietan, merkatuetako eta komertzio- eta ostalaritza-establezimenduetako sarbideetan... ".
Urtaranek azaldu duenez, Eudelek udal guztiek, txikienek bereziki, babesgarriak izan ditzaten nahi du; eta aldi berean, instituzio hurbilenak izanik, egiten duten lan garrantzitsua bultzatu eta babestu,, herritarrek birusari eusteko higiene eta osasun neurriak bete ahal izateko.
Banaketa, populazioaren arabera
Banaketari dagokionez, irizpidea populazioaren tamaina da. Hortaz, Arabako udalek 43.750 maskara jasoko dituzte guztira; Bizkaian 145.000 banatuko dira, eta Gipuzkoan 107.000.
Gainera, Gobernuaren Bizkaiko Ordezkariordetzarekiko lankidetza-esparruan, Eudelek bere materialaren banaketa baliatuko du aldi berean Espainiako Gobernuaren 52.400 maskarak banatzeko; azken hori Bizkaiko 20.000 biztanle baino gutxiagoko 101 udalerriei zuzenduta dago.
