Gizartea -
Koronabirusa
Erkidegoek ostiral gauean edo larunbatean izango dute Fase aldaketaren berri
Hori da Fernando Simonek prentsaurrekoan adierazi duena. Euskadiri buruz, Simonek esan du erkidegoa "egoera nahiko onean” dagoela, baina “xehetasun asko" kontu handiz aztertu behar direla.
Agentziak | Erredakzioa
Fernando Simon, Espainiako Osasun Larrialdietarako Koordinazio Zentroaren zuzendariak iragarri du erkidegoei ostiral gaua eta larunbata bitartean jakinaraziko zaiela Fase batetik bestera pasatuko duten ala ez. 0 Fasetik 1 Fasera igarotzeko data maiatzaren 11 da, astelehena.
Simonek argi utzi du azken erabakia Salvador Illa Osasun ministroak hartuko duela. Halaber, lurralde bakoitzeko txostenak egingo direla azaldu du. Txosten horiek publikoak izango direla uste du Simonek, eta hor argituko dira erabilitako irizpideak zeintzuk izan diren eta horiek kontuan izanda egindako balorazioa. Txostenak zuzendari nagusiaren sinadura eraman beharko du.
Erabakiak hartzeko garaian, kutsatze berrien antzemateak eta jarraipenak, eta Zaintza Berezietako Unitateetan gaixoentzako dauden oheen kopuruak pisu berezia izango dute. Mugikortasunak garrantzi berezia duen hirien kasuan, Madrilen adibidez, Garraio ministerioak ere txosten bat egin beharko du.
Hori guztiaren gainetik, Simonek azpimarratu egin du irizpideak osasunari lotutakoak izango direla, eta ez ekonomiari lotutakoak.
Hala ere, edozein kasutan, azken erabakia ministroak hartuko du, eskaerak aztertzen dituen 12 pertsonako taldearen balorazio teknikoa jaso ostean. Balorazio horrek “osasun irizpideei” jarraituko die.
Euskadiren egoera
Larrialdietako Zentroko zuzendariak ere Euskadiren egoera aipatu du, maiatzaren 11n 1 Fasean sartzeko eskaera ofiziala egin ostean. Euskadiren egoera “nahiko ona” dela onartu du, baina zenbait lurralderen egoera kontu handiz aztertu behar dela azpimarratu du, “xehetasun askori begiratuta”. Hori egin ondoren bakarrik erabakiko dute zeintzuk pasatuko diren 1 Fasera.
Lurralderen batek ministerioak ezarritako gutxieneko baliabideak ez dituenean, Simonek esan du ez duela horniketa faltaren inguruko berririk, baina, beharrezkoa izanez gero, Osasun ministerioak beharrezko materiala helaraziko diela adierazi du.
Aldaketak ordutegietan
Ordutegiei dagokienez, Simonek onartu egin du erkidego batzuek etxetik ateratzeko ordu tarteetan aldaketak egitea eskatu dutela, eta aukera hori aztertzen ari direla. “Ordutegiak ezin dira berdinak izan iparraldean eta hegoaldean”, esan du, eta, ondorioz, “Ministerioak aukerak emango ditu”. Aukera horiek txosten batean bilduko dira eta txosten hori bere bulegoan aztertuko dute.
Hondartzetan bainuak baimentzeko aukeraz galdetuta, txostenak egingo dituztela esan du, gaia “nolabait arautu behar delako”.
