Donostiako Udalak terrazak handitzeko aukera emango du

Donostiako Udalak iragarri duenez, datorren astelehenetik aurrera hasiko da baimenen tramitazioa. Baimen horiek aldi baterakoak izango dira, eta automatikoki indargabetuko dira horiek justifikatzen dituzten mugak amaitzen direnean.

Terraza duten establezimenduek maiatzaren 11tik aurrera ireki ahal izango dute, baina edukieraren % 50 soilik okupatu ahal izango dute.

Establezimenduen jabeek udalaren webgunearen bidez egin ahal izango dute eskaera, eta bertan horretarako fitxa espezifiko bat gaituko da.

Era berean, Udalak bide publikoan erakusmahaiak edo antzeko instalazioak jartzeko baimena emango die saltokiei, baldin eta "espaloia gehiegi inbaditzen ez badute eta hiriaren eguneroko bizitza oztopatzen ez badute" eta jabari eta erabilera publikoko espazioetako okupazioak arautzen dituen ordenantzak xedatutakoa betetzen badute.

Hala ere, ezin izango direla neurriaz baliatu espaloi estuak dituzten kaleetan kokatutako establezimenduak edo gertuko lokalak dituztenak ohartarazi du.

Handitzea "egingarriagoa" izango da plaza irekietan, espaloi zabalak dituzten eremuetan, kale estuagoetan baino. Parte Zaharrekoetan, esaterako, Zuloaga Plazan izan ezik ezingo da aurrera eraman.

Udalak adierazi duenez, terraza, bermeak betetzen badira, dagokion tabernaren aurrean egon ahal izango da, "nahiz eta horretarako bide bat gurutzatu behar izan", edo "izkinaren bueltan, baldin eta espazioa horretarako egokiagoa bada eta inori kalterik egiten ez badio".

Mahai itxien kasuan, alboetako bat beti irekita egon beharko da, handitu ahal izateko.

Udalak ez duela kobratuko terrazek jarduera garatu ez duten denborari dagokion okupazio-tasa zehaztu du.