Eskoletarako itzulera "zorrotz" antolatzeko eskatu du Podemos Euskadik

Hainbat hezkuntza maila ikasgeletara itzultzeko Eusko Jaurlaritzak hartutako erabakiagatik "hezkuntza komunitatean eragindako nahastea eta ondoeza" salatu ditu Podemos Euskadik. Itzulera hori "zorrotz" antolatu behar dela eskatu du, eta ikasturtea gainditzeko nahiz unibertsitaterako sarrera-probak prestatzen dabiltzan ikasleentzat itzulera hori boluntarioa izatea proposatu du.

Ohar baten bidez Podemos Euskadik jakinarazi duenez, "hezkuntza komunitatearekin eta sindikatuekin hitz egitera eta akordioa lotzera behartuta dago" Jaurlaritza. "Data zehaztu beharrean, premiazkoa da eragile guztiekin lan egitea, langileen, ikasleen eta gizarte osoaren osasuna bermatu dezaten", adierazi du.

Zentzu horretan, Eusko Jaurlaritzari leporatu dio "gizartearen gehiengoaren nahiarekin bat egin ez izana". "Oinarririk gabeko urratsak ematen ari da, ikasleen, irakasleen eta langileen borondatea mespretxatuz", kritikatu du alderdiak.

Podemos Euskadik adierazi duenez, Hezkuntzak "daten inguruan hitz egin du, beharrezkoak diren segurtasun neurrien gainean ziurtasunik eskaini gabe". Hori dela eta, Hezkuntza Sailaren "inprobisazioa eta ardugabekeria" salatu ditu, "eta bere plana martxan jarri nahi du hezkuntza erkidegoaren iritzia kontuan hartu gabe".