Gizartea -
Deseskalatzea
Horrelakoa izango da 2 fasea maiatzaren 25az geroztik
Zinemaz edo antzerkiaz gozatzera joan ahalko gara, jatetxe barruetan jan eta ezkontzak ospatu, baina murrizketekin, eta segurtasun distantziak gordeta.
EITB.EUS
Deseskalatze prozesuaren 2 fasea indarrean sartuko da maiatzaren 25ean Espainiako Gobernuko adituek zehaztutako baldintzak betetzen dituzten lurralde horiek. Segurtasun tartea eta higiene-neurriak gordetzea funtsezkoa izaten jarraituko du. Mugikortasun eta biltzeko baldintzei begira, 2 fase horretan aldaketa garrantzitsuak izango dira, besteak beste:
-Aire librean ospakizunak egin ahalko dira, gehienez jota 100 pertsona bilduta, 50 laguneko mugarekin leku itxian bada. Ospakizun horien artean daude, esaterako, ezkontzak.
-Beilak eta hiletak egin ahalko dira, gehienez jota 25 lagunekin aire librean ala 15 leku itxietan bada, etxe berean bizi ala ez.
-Merkatal zentroak ireki ahalko dituzte, edukiera murrizketarekin. Jatetxeetan barruan kontsumitu ahalko dute bezeroek, baina edukieraren % 40a gainditu gabe.
-Hoteletako eta ostatu turistikoetako zonalde komunak ireki ahalko dituzte berriro.
-Zinema-aretoak eta antzokiak ireki ahalko dituzte, baina edukieraren % 30 gehienez jota.
-Igerilekuak irekiko dituzte, baina aurretiazko hitzorduarekin, segurtasun-distantzia gordeta eta edukieraren % 30 gainditu gabe.
-Hondartzara ere joan ahalko gara, 15 pertsona arteko taldeetan gehienez jota, eta segurtasun distantzia errespetatuta.
-70 urte beherako herritarrek kirola egin ahalko dute edozein ordutan, adinekoentzako ordutegia-tartean izan ezik.
-Enpresei dagokienez, telelana lehenetsiko da oraindik ere.
Azkenik, kontuan hartu behar da Eusko Jaurlaritzak eskumena duela baldintza horiek gehiago zorrozteko, 1 fasean gertatu zen bezala.
