Gizartea -
Emakumeen aurkako indarkeria
35 urteko gizon bat atxilotu dute Gasteizen, bikotekidea jipoitzea egotzita
Emakumea Txagorritxuko ospitalera eraman dute anbulantzian, zauriak sendatzeko.
Agentziak | Erredakzioa
35 urteko gizon bat atxilotu dute ostegunean Gasteizen, genero indarkeria delitu baten ustezko egilea delakoan, bikotekidea jipoitu ostean, Eusko Jaurlaritzako Segurtasun Sailak jakitera eman duenez.
Arratsaldeko 17:30ak aldera, herritarren babeserako lanetan ari zen patruila bat Gasteizko San Kristobal auzoko etxe batera joan zen, etxebizitza batean eztabaida izan zezaketela jakinarazi ostean.
Poliziak emakume batekin hitz egin zuen eraikineko eskaileretan, aurpegian zauri odoltsu bat zuela, eta neska gazte batekin batera zegoela.
Emakumeak azaldu duenez, lesio horren egilea bere bikotekidea izan zen, eta une horretan etxebizitzan zegoen. Biktimak salatu duenez, eztabaida baten ondoren, bikotekideak iletik heldu, lurretik arrastaka eraman eta esku batekin aurpegian jo zuen. Gainera, azken hilabeteetan tratu txarrak eta mehatxuak jasan dituela gaineratu du.
Patruila bikotearen etxera joan zen, eta ustezko inplikatua identifikatu ondoren, atxilotu egin zuten. Emakumea Txagorritxuko ospitalera eraman zuten anbulantzian, zauriak sendatzeko. Atxilotua ostiral honetan eraman dute epaitegira.
