Gizartea -

Koronabirusa

Generalitateak ez du baztertzen Segrian etxeko itxialdia ezartzea

Alba Verges Kataluniako Osasun sailburuari Lleidako eskualde horren barruan gertatu daitekeenak eragiten dio kezka, kanpoko mugak ixtetik haratago.

Esquadra Mossoen kontrola errepide batean, Lleidan. Argazkia: EFE
Esquadra Mossoen kontrola errepide batean, Lleidan.
Esquadra Mossoen kontrola errepide batean, Lleidan. Argazkia: EFE

Agentziak | eitb.eus

Whatsapp Facebook Twitter Telegram Email

Alba Verges Generalitateko Osasun sailburuak onartu duenez, baliteke Segria eskualdeko (Lleida) biztanleei etxeko itxialdia ezartzea, koronabirus agerraldiaren ostean: "Ezin dugu ezer baztertu".

Hala ere, "neurriak jarraitzen badira", ez litzateke itxialdia gogortu beharko, esan du Rac1 irratian emandako elkarrizketa batean.

Jende pilaketak saihesteko eta hamar pertsonako bilkurak ez egiteko garrantzia azpimarratu du Vergesek: "Kontua ez da aktibitate ekonomikoak ixtea, baizik eta aktibitate soziala gutxitzea".

Kanpoko mugak ixtetik haratago, sailburua gehiago kezkatzen du eskualde barruan gertatu daitekeenak: "Ez luke ezertarako balio perimetroa ixteak eta alboko eskualdeetara joatea debekatzeak, eta aldi berean barruan birusa transmititzen uzteak".

Aktibitate ekonomikoak

Sailburuak gogorarazi duenez, fruituaren kanpainak irauten duen bitartean, biztanle kopurua bikoiztu egiten da, eta gero pertsona horiek Espainia osoan zehar mugitzen dira. Izan ere, kutsatuen zati handi bat migratzaileak eta sasoikako langileak dira.

Segriako eskualdean (Lleida) ezarritako itxialdia Bartzelonako Conca d’Odena eskualdean ezarri zutenaren "antzekoa" da, Miquel Buch Kataluniako Generalitatearen Barne sailburuan azaldu duen bezala. Hala ere, momentu horretan lanera joateko joan-etorriak debekatu baziren ere, oraingoan baimendu egin dituzte.

La Vanguardia kazetak zabaldu duenaren arabera, Kataluniako beste lekuetan ikertutako kasu positiboak Lleidako agerraldiarekin zerikusia dute, eta gehienetan nekazaritza sektoreko enpresekin daude lotuta. Deseskalatzearen lehenengo fasetan langileak jaso zituzten enpresa horiek.

Hala ere, normaltasunez ireki ahal izango dira negozioak astelehenetik aurrera Lleida hiriburua barnean hartzen duen eskualdean. "Printzipioz, aktibitate ekonomikoa ez da gelditu", azaldu du sailburuak Catalunya Ràdio irratian.

Miquel Pueyo Lleidako alkateak EFEri esan dionez, "Estatua beste alde batera begiratzen ari da" nekazaritzan lan egin nahi duten sasoikako langileen etorreraren aurrean, baita alarma egoeran ere. Horietako batzuk, gainera, bizileku-baimenik gabe, esan duenez.

Alkateak argitu du sasoikako langileak ez direla orain Lleidako hiriburuan gertatzen ari denaren "erantzuleak", eta esan du "itxialdi garaian, Estatuak probintzien arteko mugikortasunik ez zegoela bermatu behar zuenean", hirira Kanarietako, Balear uharteetako, Andaluziako eta Euskal Herriko jendea etorri zela.

Orduan, alkateak gogorarazi duenez, hirira "jende kopuru handia etortzen ari zela" ikusita, hori "kezkagarria" zela esan du.

Pueyok esan duenez, udaro 25.000 eta 30.000 pertsona artean heltzen dira Lleidara fruta bilketan lan egitera. “Bartzelonara kolpean 130.000 pertsona helduko balira bezalakoa da”, alderatu du.

600 euro arteko zigorrak

Itxialdia ez betetzeagatik ezarriko diren zigorrak 100 eta 600 euro artekoak izango dira. Osasun Publikoaren Legean jasotakoaren arabera.

Segria itxialdian sartzeko erabakia aho batez hartu du Generalitateak, "datuen pisu eta indar guztia eta adituen eskarmentua eta ezagutza" kontuan hartuta, esan du sailburuak.

"Larrialdi zerbitzuak datuek eskatzen diguten heinean aktibatzen ditugu", esan du, eta gogorarazi du osasun mailako erabakiak Osasun sailari dagozkiola.

Kataluniako positibo berrien erdia Lleidan dago

Lleidako probintzian erregistratu dira Katalunian azken orduetan zenbatutako 294 kutsatu berrien erdia. Kataluniako Osasun sailaren arabera, Lleidako osasun eskualdean 140 koronabirus kasu identifikatu dira azken orduetan.

Lleidako Arnau de Vilanova ospitalean 27 pertsona daude COVID-19arekin, eta horietako lau, ZIUn, Pueyo alkatearen arabera.

Ospitalea, gainera, etxean isolatuta dauden beste hiru pertsonaren jarraipena egiten ari da.

Lleidako zentro pribatuetara bideratu dituzte 11 kasu susmagarri.

Hau zure interesekoa bada, baliteke beste gai hauek ere izatea
Katalunia Gizartea Eguneko albisteak Albisteak Osasun albisteak Koronabirusa Deseskalatzea