Gizartea -
COVID-19
Valladolideko bi udalerri konfinatzea baimendu du epaile batek, agerraldi batengatik
Iscar eta Pedrajas de San Esteban udalerrietan 9.500 biztanle bizi dira, eta konfinamendua dela-eta, besteak beste, irteerak eta sarrerak mugatuak izango dituzte.
AGENTZIAK | ERREDAKZIOA
COVID-19a geldiarazteko plana Valladolideko Iscar eta Pedrajas de San Esteban udalerrietan ezartzea baimendu du Valladolideko Instrukziozko 6. Epaitegiak. Bi udalerriek guztira 9.500 biztanle dituzte, eta egungo COVID-19aren agerraldia ikusita, horiek konfinatzea erabaki dute agintariek.
Gaztela eta Leongo Gobernuak ohar baten bidez jakitera eman duenez, iragarritako neurrien artean, irteerak eta sarrerak mugatuak izango dituzte, lanagatik edo bestelako arrazoi justifikatuengatik salbu. Dena dela, bi udalerri horien artean normaltasunez mugitu ahalko dira.
Iscar udalerriko agerrialdian, 22 kasu positibo atzeman ziren astelehenean, eta azken orduetan, berriz, 42 izan dira zenbatutakoak. Horietatik, 17 hegazti-hiltegi bateko langileak dira eta 25 familiartean kutsatutakoak. Agerraldia uztailaren 11an langileek egindako bazkariarekin lotuta egon liteke.
