Gizartea -

KORONABIRUSA

Basurtuk pabiloi bat bideratu du eta Gurutzetak bi solairu covid-19 kasuetarako

Galdakaoko ospitalean ere solairu bat prestatu dute koronabirusarekin gaixotutako pertsonak hartzeko.

Basurtuko ospitalea. Irudia: EFE
Basurtuko ospitalea
Basurtuko ospitalea. Irudia: EFE

AGENCIAS | REDACCIÓN

Whatsapp Facebook Twitter Telegram Email

Kutsatze kopurua goraka egiten ari dela ikusita, koronabirusarekin gaixotutako pazienteak artatzeko pabiloi bat prestatu dute Basurtuko ospitalean, bi solairu Gurutzetako erietxean eta beste bat Galdakaoko ospitalean.  

Azken asteetan ehunka kasu antzeman dituzte Bizkaian, eta gaur inoizko kopururik handiena detektatu dute egun bakarrean Euskal Autonomia Erkidegoan: 724 positibo.

Basurtuko zuzendaritzak ohar baten bidez jakinarazi duenez, Makua pabiloia prestatzea erabaki dute, ospitaleratzea behar duten koronabirus kasu gehiago egon daitezkeelako. Horretarako, bertan artatzen ziren pediatriako larrialdiak Pelayo pabiloira eraman dituzte.

Lekualdaketa horrek, ostiral goizean gauzatu dena, Basurtuko Unibertsitate Ospitaleko pediatriako larrialdien egungo kokalekua Makua pabiloian uzteko eta bertan koronabirusaren balizko kasu positiboak artatzeko aukera emango du. Bilboko osasun zentroak zehaztu duenez, lekualdatze horrek ez du eraginik izango jaioberrien arretan.

Neurria, apartekoa dena eta pediatriako larrialdietako zerbitzuaren erabiltzaileei ulermena eskatzen duena, "espazioen eskuragarritasuna bilatzera, baita pediatriako pazienteen segurtasuna zaintzera ere, segurtasun- eta arreta-neurri guztiak bermatzen dituen zirkuitu baten bidez" bideratuta dago.

Gurutzetako Ospitaleak, bere aldetik, bosgarren eta seigarren solairuak covid-19 pazienteak jasotzera bideratu dituela jakinarazi du. Zainketa intentsiboetako 69 ohe dituzte berton, eta beste bi eremu berri egokitzeko obrak egiten ari dira, ospitaleratze asko egon litekeen egoera batean ospitaleari 215 ZIU ohe emango lizkieke gaixo larriei arreta emateko.

Bestalde, Galdakaoko Ospitaleak jakinarazi du solairu bat prestatu duela koronabirusarekin gaixotutako pazienteak hartzeko. Halaber, kutsatuta egon daitezkeen pertsonentzako unitate berezi bat jarri dute, larrialdietan.

Horrez gain, ospitaleratzeko solairu bat egokitu egin dute, pneumoniagatik oxigenoa behar duten pazienteei bitarteko zaintza emateko.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu dira; beraz, agintariek emandakoei bakarrik egin kasu. Gaitzaren sintomarik baduzu eta EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu COVID-19a ez hedatzeko modurik eraginkorrena eskuak sarri garbitzea dela. Ahoa estaltzeko maskarak derrigorrezkoak dira EAEn uztailaren 16tik, eta Nafarroan, uztailaren 17tik. Iparraldean, berriz, "espazio publiko itxietan" derrigorrezkoa da.

Hau zure interesekoa bada, baliteke beste gai hauek ere izatea
Bilbo Bizkaia Barakaldo Euskal Autonomia Erkidegoa Gaixotasunak Gizartea Eguneko albisteak Albisteak Osasun albisteak Basurtuko ospitalea Gurutzetako ospitalea Koronabirusa