828 positibo atzeman dituzte azken orduetan Hego Euskal Herrian

673 lagunek positibo eman dute azken 24 orduetan Euskal Autonomia Erkidegoan, Eusko Jaurlaritzako Osasun Sailak jakitera eman duenez. Larunbat honetan 7.261 PCR proba egin dira eta, haietatik, 673 positiboak izan dira.

Lurraldeka, 128 erregistratu dira Araban, 359 Bizkaian, 182 Gipuzkoan eta 4 Euskaditik kanpo bizi diren pertsonetan.

Ospitaleen egoera dela eta, COVIDaren ondorioz 32 pertsona ospitaleratu zituzten atzo, eta COVIDa duten 33 pertsona ZIUn daude.

Udalerrietako kasuak eta R0 indizea astelehenean eguneratuko dira.

Foru Erkidegoan

Bestalde, 155 kasu positibo gehiago atzeman dituzte Nafarroan, Nafarroako Osasun Publikorako Institutuak zabaldutako datuen arabera. Ostiral honetan, 1.795 PCR proba egin zituzten, eta % 8,5 izan ziren positibo.

COVID-19aren ondorioz, 9 ospitaleratze gehiago izan dira azken 24 orduetan, baina horietako bat ere ez dute ZIUn sartu. Azken 24 orduetan pertsona bat hil da koronabirusaren ondorioz: 64 urteko emakume bat. Beraz, pandemia hasi zenetik 534 lagun hil dira Nafarroan, Nafarroako Foru Gobernuak ohar baten bidez jakinarazi duenez.

Nafarroako erietxeetan 73 lagun daude ospitaleratuta, horietatik 8 ZIUn eta 10 euren etxeetan.

Zonaldeka, Iruñean eta Iruñerrian izan dira positiboen % 42, Tuteran % 27 eta Lizarran % 10.