Gizartea -
Koronabirusa
Konfinamendua berriro Miranda Ebron, COVID-19 kasuek gora egin dutelako
Hala ere, konfinamenduak Arabaren eta Burgoseko herriaren arteko “harreman estuan” eragin handirik ez izatea espero du Foru Aldundiak.
Agentziak | Erredakzioa
Burgosko Miranda Ebro herria berriz konfinatuko dutela iragarri du Gaztela eta Leongo Gobernuak ostiral honetan. 35.000 biztanle baino gehiagoko herriak Arabarekin muga du, eta bi aste emango ditu konfinamenduan. Neurria igandean sartuko da indarrean, 00:00etan, eta urriaren 10era arte luzatuko da. COVID-19 kasuek gora egin dute azken egunetan. Pandemia hasieran Miranda Ebro isolatu zuten dagoeneko.
Birusaren “transmisio komunitarioa saihesteko” asmoa dutela azaldu du Gaztela eta Leongo Gobernuak ohar batean. Horretarako mugikortasuna kontrolatzeko eta murrizteko neurriak aplikatuko dituzte ostalaritzan, osasun zentroetan eta jendea bildu daitekeen jardueratan.
Aurreko kasuetan bezala, Justiziak neurriak berretsi behar ditu. Mugimendu edo biltzeko askatasuna bezalako eskubideak murrizteko orduan neurriz jokatzea bermatu behar du Justiziak, prebentzioa eta osasun publikoaren babesa balantzan jarriz.
Osasun Kontseilaritzaren agindua bihar argitaratuko dute Gaztela eta Leongo Aldizkari Ofizialean.
Arabak ez du eragin handirik espero
Konfinamenduak Arabaren eta Burgoseko herriaren arteko “harreman estuan” eragin handirik izango ez duela uste du Foru Aldundiak.
Arabako Aldundiko iturriek azaldu dutenez, “Arabak udalerriarekin duen harreman estuan eragin handirik” ez du espero erakundeak; osasun, hezkuntza eta lan arrazoiengatik mugitzea posible izango delako.
“Hala eta guztiz ere, osasuna eta birusa hedatzea eragoztea dira lehentasuna”, azpimarratu dute iturriek.