Onik aurkitu dute perretxiko bila joan, eta Artikutzan galdu zen gizona

Onik aurkitu dute gaur goizaldean Artikutzan atzotik falta zen 73 urteko gizona. Perretxiko bila joan zen Oiartzungo parke naturalera, eta itzultzen ez zela ikusita, 112 zerbitzuari abisu eman zion emazteak, 20:00ak aldera.

Larrialdi zerbitzuek, Ertzaintzako mendi eta txakur taldeek, suhiltzaileek, DYAk eta basozainek 73 urteko gizonezkoa bilatzeko dispositiboa martxan jarri zuten 21:45 aldera, gizonak ibilgailua utzi zuen tokitik.

Eusko Jaurlaritzako Segurtasun Sailak jakitera eman duenez, 05:30 aldera topatu dute desagertua, onik. Zehazki, inguru horretan zebilen mendizale batek aurkitu du.