Gizartea -
SANTO TOMAS
Bilboko Konpartsak elkarteak ez du ekitaldirik egingo San Tomas egunean
Konpartsek ez dute ekitaldirik antolatuko abenduaren 21ean, COVID-19ak eragindako egoera dela eta. Azaldu dutenez, “prebentzioa eta elkar-zaintza printzipioak kontuan izanik” hartu dute erabakia.
EITB.EUS
Bilboko Konpartsen Federazioak San Tomas eguneko azokan, abenduaren 21ean, ekitaldirik ez antolatzea erabaki du. Gaur egungo osasun egoera dela eta, konpartsek ez dute sukaldaritza edota kultur programaziorik antolatuko Bizkaiko baserritarren egun nagusian.
"Bertoko ekoizpenaren zein elikadura-eredu burujabe baten aldeko apustua egiteko", Bilboko konpartsek San Nikolas elizaren ingurua dinamizatzen dute urtero. Bertan, umeentzako emanaldiak, bertsoak, txalaparta, erromeria, kantu-kalejira eta bertako janari eta edariak eskaintzen dituzte.
Gaur egun bizi dugun pandemiak, baina, datorren abenduaren 21erako ekitaldirik ez antolatzeko erabakia hartzera eraman ditu konpartsak. Azaldu dutenez, "prebentzioa eta elkar-zaintza printzipioak kontuan izanik" hartu dute erabakia.
Bilboko Konpartsak elkarteak abuztuan aurreratu zuen San Tomas eta Aratusteak ez zirela erronka errazak izango COVID-19aren ondorioz, eta, orduan egin zuen bezala, "jai herrikoiak, parte-hartzaileak, feministak, euskaldunak eta ekologistak" babesteko eta, koronabirusaren egoerak eragindako krisi ekonomikoaren aurrean, zerbitzu publikoak babesteko deia egin du berriz. Konpartsek lehen sektorea eta elikadura burujabetza babesteko ere eskatu diote gizarteari; izan ere, "bertoko ekoizle txikien elikagaiak kontsumitzeak garrantzi handia izango du ingurumena eta gure inguruko herrietako bizitza sozio-ekonomikoa eta linguistikoa babesteko".
